آلصمت له عندي معزّه ومقدار
في زحمة الافواه .. يا مــــزين الصمت !!
لا صار بعض البوح عند البشر عار
لو يشتعل جوفي حشـــــــــــــــى ما تكلّمت
تعبت من قولة : (علامك) و (وش صار )
وان طحت ما ألقى ســــــوى كلمة (سلمت)
واعذار اخلقها ولو مالي اعذار
مشّيتها مره .. ومـــــــــــــرات ما رمت !!
كذبة صباح الخير/ يا صبح الانوار
عذري ليا عـــــــــــــــدّت ليالي ولا نمت .!.
اسهر طوال الليل وضْيوفي افكار
واقول لاْصحابي : نعم تــــــــــوّني قمت !!
ما عاد فيني ألفت عْيون واْنظار
يكفي بأني من زمـــــــــــــاني تعلّمت .؟.
ان الصدر بيتـ/ـن .. وسكّانه اسرار
نيام .. بس يصحــــــــــــــــون لامن تألّمت
يصحون ويناظرهم الجار والمّار
وش عاد ينفع سترهم لو تــــــكتّمت ؟!!
آقدّم اقدامي على درب الاصرار
امشي ولكن للأسف ما تقـــــــــــــــدّمت
( النار قدامي .. ومن خلفي النار !!)
والعمر يمضي بي وانا ما تـــــــــــــــولّمت ؟!
يا لين ذاك الحلم في لحظه انهار
وانا مع لحظة سقوطـــــــــــــــه تحطّمت .؟.
جروحي كثار .. وتناهيدي كثار
لكن على كثر المواجــــع .. تبسّمت !!
ثمّ أْلتزمت الصمت وعزومي كبار
ولو يشتعل جوفي حشى ما تكلّمت ..؟!